PDIU takim në Korçë dhe Devoll, Idrizi: Ne kemi propozuar një ministri për Emigracionin ose një ministri të Diasporës

 

Partia Drejtësi, Integrim dhe Unitet ka zhvilluar takime për zgjedhjet e 25 qershorit në qytetin e Korçës dhe në Devoll. Nga Korça, kryetari i PDIU-së Shpëtim Idrizi, u shpreh se 35% e shqiptarëve jetojnë jashtë vendit, prandaj është e nevojshme Ministria e Diasporës ose Ministria e Emigracionit.

“35% e shqiptarëve janë jashtë Shqipërisë. Ata kontribuojnë jashtëzakonisht në ekonominë e këtij vendi, janë jashtëzakonisht kontributorë në mirëqenien e këtij vendi, në familjet tona. Por, ne shohim sot që shteti shqiptar nuk ka një institucion të fuqishëm që t’i drejtohet atyre, nevojave që ata kanë. Emigrantët kanë probleme në radhë të parë me përfaqësitë tona diplomatike, kanë probleme të ekzistencës për të ruajtur fëmijët e tyre, gjuhën shqipe dhe identitetin tonë kombëtar. Kjo është arsyeja pse ne kemi propozuar një ministri për Emigracionin apo një ministri të Diasporës. Mendojmë që duhet ndryshuar ligji për shtetësinë. Për të gjithë ata që kanë origjinë shqiptare të diasporës së vjetër dhe të re duhe të kenë mundësinë që të marrin shtetësinë shqiptare. Ju e keni parë që vazhdimisht flitet për emigrantët që duhet të votojnë. Shumë herë premtohet një gjë e tillë. Ju e dini që ne kemi problem këtu për të administruar dhe ruajtur votat, imagjinoni atyre që janë në emigracion. Ne kemi propozuar që diaspora e vjetër dhe e re duhet të ketë vende të caktuara në Parlamentin e Shqipërisë. Ne e kemi traditë si shqiptarë, mjafton që t’ju kujtoj që në vitin 1920, në kohën e mbretit Zog, një deputet vinte nga “Vatra” e Amerikës, një tjetër vinte nga Arbëreshët e Italisë për të qenë prezent, për të sjellë zërin dhe vokacionin e tyre në Shqipëri”,- tha kryetari i PDIU-së.

Z.Idrizi theksoi se shteti duhet të bëjë më shumë për të mbrojtur produktet vendase.

“Nëpër Shqipëri çdo pëllëmbë tokë është e punuar, nga njerëz të punës dhe fisnik. Por në programin tonë e dimë shumë mirë, që të kesh një ekonomi të zhvilluar patjetër që duhet të kthesh vëmendjen tek njerëzit që punojnë dhe për këtë arsye ne mendojmë, që një ndër mundësitë e jashtëzakonshme për zhvillimin e vendit tonë është bujqësia dhe ja ku e tregoni ju këtu në Devoll. Unë zotohem para jush, se ne do të bëjmë gjithçka me nisma konkrete për të mbrojtur produktet vendase. Sepse unë e di shumë mirë që shumë prodhime këtu në Devoll, por edhe në zona të tjera të Shqipërisë konkurohen nga vendet fqinje dhe nuk konkurohen sepse kanë çmime më të mira apo se janë produkte më cilësore, por ato konkurohen sepse shteti shqiptar nuk e ka pasur mendjen asnjëherë tek fermeri. Ne do të marrim nisma në Parlamentin e Shqipërisë për të mbrojtur produktet shqiptare”,- tha Shpëtim Idrizi. i cili u bëri thirrje qytetarëve të qarkut të Korçës që të votojnë nr.13.

Ndërsa kryesuesi i listës për deputet në qarkun e Korçës Spartak Meraku, tha se: Si deputet do të jem çdo ditë pranë halleve dhe problemeve tuaja. Problemi më i madh i joni janë produktet që prodhojmë në Korçë e Devoll, por nuk ka treg. Prandaj në Parlament duhet ngritur zëri, në mënyrë që shteti të mbrojë prodhimet tona. 

 

Të RejatPDIU takim në Korçë dhe Devoll, Idrizi: Ne kemi propozuar një ministri për Emigracionin ose një ministri të Diasporës

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *